اقمولا وبلىسىنىڭ تسەلينوگراد اۋدانىندا رەسمي ستاتيستيكا بويىنشا 70 مىڭعا جۋىق تۇرعىن بار. الايدا وبلىستىق ىشكى ىستەر دەپارتامەنتىنىڭ دەرەگى بويىنشا مۇنداعى تۇرعىندار سانى 170 مىڭ ادامعا جەتكەن.
وسىعان بايلانىستى كوپتەگەن پروبلەمالاردى شەشۋگە اۋداندىق ىشكى ىستەر ورگاندارىنىڭ قارىمى جەتە بەرمەيدى. سونىڭ ىشىندە تىركەلگەن قىلمىستاردى اشۋدا پوليتسيا قىزمەتكەرلەرىنە جۇكتەلەتىن مىندەتتەر دە ەسەلەپ ارتىپ وتىر. شاعىن اۋدانعا بولىنگەن قىزمەتكەرلەر تۇرعىنداردىڭ كوپتىگى سەبەبىنەن ءوز مىندەتتەرىن تياناقتى اتقارا الماۋدا. اسىرەسە وپەراتيۆتىك ىزشىلدەر قۇرامىنىڭ قارىمى قىسقا. تۇرعىنداردان تۇسەتىن ارىز-شاعىمدار دا ۋاقتىلى قارالمايدى. سونداي-اق تۇرعىن ءۇي مەن جەر قاتىناستارىن رەتتەۋدە دە از ساندى بولۋى سەبەپتى ىشكى ىستەر ورگاندارى وسالدىق تانىتىپ وتىر. وسىنىڭ ءبارى الەۋمەتتىك كيكىلجىڭدەردىڭ تۋىنا سەبەپشى بولاتىن ءتۇرى بار.
اتالمىش سەبەپتەر حالقىنىڭ سانى كوشىپ كەلۋشىلەردىڭ ەسەبىنەن ۇنەمى ارتىپ وتىراتىن استانا توڭىرەگىندەگى وسى اۋدانعا قوسىمشا پوليتسيا بولىمشەلەرىن اشۋدى تالاپ ەتىپ وتىر. اۋداندىق ىشكى ىستەر ءبولىمىنىڭ قازىرگى شتاتتىق قۇرامى 157 ادام, ال بەكىتىلگەن نورماتيۆ مۇندا قوسىمشا 245 ادام الۋدى قاجەت ەتەدى.
ءدال وسىنداي پروبلەما وبلىستىڭ بۋراباي اۋدانىندا دا بار. مۇندا پوليتسيا قىزمەتكەرلەرىنىڭ شتاتى 259 ادام, ال نورماتيۆ قوسىمشا 145 بىرلىكتىڭ اشىلۋىن تالاپ ەتەدى. ششۋچە-بۋراباي كۋرورتتى ايماق بولعاندىقتان مۇندا جىل سايىن ءبىر ميلليوننان ارتىق تۋريست كەلەدى. سونداي-اق حالىقارالىق جانە رەسپۋبليكالىق دەڭگەيدەگى مەملەكەتتىك شارالار دا ءجيى وتكىزىلىپ تۇرادى. ءتارتىپ ساقتاۋدا بەلسەندىلىكتى ارتتىرۋ ءۇشىن بۇلاردىڭ ءبارى پوليتسيا قىزمەتكەرلەرىنىڭ مولىراق بولۋىن قاجەت ەتەدى. ونىڭ ۇستىنە ساۋىقحانالار مەن كازينولار دا مۇندا جەتەرلىك. ءتارتىپ ساقتاۋ مىندەتىن اتقارۋ ءۇشىن وبلىستىق ىشكى ىستەر دەپارتامەنتى مۇندا شارالار وتكىزىلگەندە باسقا اۋدانداردان قىزمەتكەرلەر تارتۋعا ءماجبۇر بولۋدا. ال ول ۇلكەن شىعىندى تالاپ ەتەدى.
قىلمىس سانىنا كەلەتىن بولساق, بۇل اۋدانداردا ولاردىڭ ەسەلەپ وسكەنىن كورەمىز. ماسەلەن تسەلينوگراد اۋدانىندا 2007 جىلى 226 قىلمىس تىركەلسە, 2017 جىلى ونىڭ سانى 1301-گە جەتكەن. بۋراباي اۋدانىندا دا سونداي تەندەنتسيا بايقالادى. مۇندا تيىسىنشە 708 قىلمىس تىركەلسە, بىلتىر 1125 قىلمىس ورىن العان.
وسىعان بايلانىستى پرەمەر-مينيستر باقىتجان ساعىنتاەۆتىڭ اتىنا جولداعان دەپۋتاتتىق ساۋالدا, ناقتى شەشىم قابىلداۋ ءۇشىن ءتيىستى ورگانداردىڭ وكىلدەرى جەرگىلىكتى جەرگە بارىپ, ماسەلەنى زەرتتەپ, وسى ەكى اۋداننىڭ پوليتسيا قىزمەتكەرلەرىنىڭ سانىن ءتيىستى نورماتيۆكە كەلتىرۋ تۋرالى تاپسىرما بەرۋىن ءوتىنىپ وتىرمىز.
داۋرەن ادىلبەكوۆ,
سەنات دەپۋتاتى